Deuteronomy 17
1ⲛⲛⲉⲕϣⲱⲱⲧ ⲙⲙⲁϩ ⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲟⲩⲙⲁⲥⲉ ⲏ ⲟⲩⲉⲥⲟⲟⲩ ⲉⲣⲉⲟⲩϫⲃⲓⲛ ϣⲟⲟⲡ ⲛϩⲏⲧϥ ϣⲁϫⲉ ⲛⲓⲙ ⲙⲡⲟⲛⲏⲣⲟⲛ ϩⲉⲛⲃⲟⲧⲉ ⲛⲉ ⲙⲡϫⲟⲉⲓⲥ ⲡⲉⲕⲛⲟⲩⲧⲉ 2ⲉⲩϣⲁⲛⲧⲁϩⲟ ⲇⲉ ϩⲛ ⲟⲩⲉⲓ ⲛⲛⲉⲕⲡⲟⲗⲓⲥ ⲛⲁⲓ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲧⲁⲁⲩ ⲛⲁⲕ ⲛⲟⲩϩⲟⲟⲩⲧ ⲏ ⲟⲩⲥϩⲓⲙⲉ ⲡⲁⲓ ⲉⲧⲛⲁⲉⲓⲣⲉ ⲙⲡⲡⲟⲛⲏⲣⲟⲛ ⲙⲡⲉⲙⲧⲟ ⲉⲃⲟⲗ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲧⲣⲉⲩⲕⲱ ⲛⲥⲱⲟⲩ ⲛⲧⲉϥⲇⲓⲁⲑⲏⲕⲏ 3ⲛⲥⲉⲃⲱⲕ ⲛⲥⲉϣⲙϣⲉ ⲛϩⲉⲛⲕⲉⲛⲟⲩⲧⲉ ⲁⲩⲱ ⲛⲥⲉⲟⲩⲱϣⲧ ⲛⲁⲩ ⲏ ⲙⲡⲣⲏ ⲏ ⲙⲡⲟⲟϩ ⲏ ⲛⲉⲧⲏⲡ ⲧⲏⲣⲟⲩ ⲉⲡⲕⲟⲥⲙⲟⲥ ⲛⲧⲡⲉ ⲛⲁⲓ ⲉⲧⲉⲙⲡⲓϩⲱⲛ ⲉⲧⲃⲏⲏⲧⲟⲩ 4ⲁⲩⲱ ⲛⲥⲉⲧⲁⲙⲟⲕ ⲉⲡⲉⲥϩⲟⲧϩⲧ ⲉⲙⲁⲧⲉ ⲁⲩⲱ ⲉⲕϣⲁⲛϩⲉ ⲉⲣⲟⲥ ⲉⲁⲡϣⲁϫⲉ ϣⲱⲡⲉ ⲛⲁⲙⲉ ⲁⲧⲉⲓⲃⲟⲧⲉ ϣⲱⲡⲉ ⲛⲧⲉⲓϩⲉ ϩⲙ ⲡⲓ︤ⲏ︦ⲗ︥ 5ⲉⲕⲉⲉⲓⲛⲉ ⲉⲃⲟⲗ ⲙⲡⲣⲱⲙⲉ ⲉⲧⲙⲙⲁⲩ ⲏ ⲧⲉⲥϩⲓⲙⲉ ⲉⲧⲙⲙⲙⲁⲩ ⲛⲥⲉϩⲓⲱⲛⲉ ⲉⲣⲟⲟⲩ ϩⲛ ϩⲉⲛⲱⲛⲉ ⲛⲥⲉⲙⲟⲩ 6ϩⲓ ⲙⲛⲧⲣⲉ ⲥⲛⲁⲩ ⲁⲩⲱ ϩⲓ ϣⲟⲙⲛⲧ ⲛⲙⲛⲧⲣⲉ ⲙⲁⲣⲉϥⲙⲟⲩ ⲛϭⲓ ⲡⲉⲧⲟⲩⲛⲁⲙⲟⲟⲩⲧϥ ⲛⲛⲉϥⲙⲟⲩ ϩⲓⲧⲛ ⲟⲩⲙⲛⲧⲣⲉ ⲛⲟⲩⲱⲧ 7ⲁⲩⲱ ⲧϭⲓϫ ⲛⲛⲙⲛⲧⲣⲉⲉⲩ ⲉⲥⲉϣⲱⲡⲉ ϩⲓϫⲱϥ ⲛϣⲟⲣⲡ ⲉⲙⲟⲟⲧϥ ⲁⲩⲱ ⲧϭⲓϫ ⲙⲡⲗⲁⲟⲥ ⲧⲏⲣϥ ⲉⲥⲉϣⲱⲡⲉ ϩⲓϫⲱϥ ⲙⲛⲛⲥⲱⲥ ⲁⲩⲱ ⲉⲕⲉϥⲓ ⲙⲡⲡⲟⲛⲏⲣⲟⲥ ⲉⲃⲟⲗ ϩⲛ ⲉⲃⲟⲗ ϩⲛ ⲧⲉⲧⲛⲙⲏⲧⲉ 8ⲉⲣⲉϣⲁⲛⲟⲩϣⲁϫⲉ ⲇⲉ ⲣⲁⲧϭⲟⲙ ⲛⲛⲁϩⲣⲁⲕ ⲡⲁⲣⲁ ⲧⲉⲕϭⲟⲙ ϩⲛ ⲧⲙⲏⲧⲉ ⲛⲟⲩⲥⲛⲟϥ ⲙⲛ ⲟⲩⲥⲛⲟϥ ⲁⲩⲱ ϩⲛ ⲧⲙⲏⲧⲉ ⲛⲟⲩϩⲁⲡ ⲙⲛ ⲟⲩϩⲁⲡ ⲛⲙ ⲧⲙⲏⲧⲉ ⲛⲟⲩⲙⲛⲧⲗⲁ ⲛⲙ ⲟⲩⲗⲁ ⲏ ⲛⲧⲙⲏⲧⲉ ⲛⲟⲩϩⲗⲟⲩⲱ ⲛⲙ ⲟⲩϩⲗⲟⲩⲱ ϩⲉⲛϣⲁϫⲉ ⲛϩⲁⲡ ϩⲛ ⲛⲉⲕⲡⲟⲗⲓⲥ ⲉⲕⲉⲧⲱⲟⲩⲛ ⲛⲅⲃⲱⲕ ⲉϩⲣⲁⲓ ⲉⲡⲙⲁ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲥⲟⲧⲡϥ ⲛⲁϥ ⲉⲧⲣⲉⲩⲉⲡⲉⲓⲕⲁⲗⲉⲓ ⲙⲡⲉϥⲣⲁⲛ ⲙⲡⲙⲁ ⲉⲧⲙⲙⲁⲩ 9ⲁⲩⲱ ⲉⲕⲉⲃⲱⲕ ⲉⲣⲁⲧⲟⲩ ⲛⲛⲗⲉⲩⲉⲓⲧⲏⲥ ⲏ ⲉⲣⲁⲧϥ ⲙⲡⲉⲕⲣⲓⲧⲏⲥ ⲡⲉⲧⲛⲁϣⲱⲡⲉ ϩⲛ ⲛⲉϩⲟⲟⲩ ⲉⲧⲙⲙⲁⲩ ⲁⲩⲱ ⲉⲩⲉϩⲟⲧϩⲧ ⲛⲥⲉⲧⲁⲙⲟⲕ ⲉⲫⲁⲡ 10ⲛⲅⲉⲓⲣⲉ ⲕⲁⲧⲁ ⲡⲟⲩⲉϩⲥⲁϩ ⲛⲉ ⲉⲧⲟⲩⲛⲁⲧⲁⲩⲟϥ ⲉⲣⲟⲕ ϩⲙ ⲡⲙⲁ ⲉⲛⲧⲁⲡϫⲟⲉⲓⲥ ⲡⲉⲕⲛⲟⲩⲧⲉ ⲥⲟⲧⲡϥ ⲉⲧⲣⲉⲩⲧⲁⲩⲉⲡⲉϥⲣⲁⲛ ⲛϩⲏⲧϥ ⲁⲩⲱ ⲉⲕⲉϩⲁⲣⲉϩ ⲉⲙⲁⲧⲉ ⲉⲧⲣⲉⲕⲉⲓⲣⲉ ⲛϩⲱⲃ ⲛⲓⲙ ⲕⲁⲧⲁ ⲡⲉⲥⲙⲓⲛⲉ ⲙⲡⲛⲟⲙⲟⲥ ⲡⲁⲓ ⲉⲧⲟⲩⲛⲁⲥⲙⲛⲧϥ ⲛⲙⲙⲁⲕ 11ⲁⲩⲱ ⲕⲁⲧⲁ ⲡϩⲁⲡ ⲉⲧⲟⲩⲛⲁϫⲟⲟϥ ⲉⲣⲟⲕ ⲉⲕⲉⲁⲁϥ ⲛⲛⲉⲕⲣⲁⲕⲧⲕ ⲉⲃⲟⲗ ⲙⲡϣⲁϫⲉ ⲉⲧⲟⲩⲛⲁϫⲟⲟϥ ⲉⲣⲟⲕ ⲉⲟⲩⲛⲁⲙ ⲟⲩⲇⲉ ⲉϩⲃⲟⲩⲣ 12ⲡⲣⲱⲙⲉ ⲇⲉ ⲉⲧⲛⲁⲉⲓⲣⲉ ϩⲛ ⲟⲩⲙⲛⲧϫⲁⲥⲓϩⲏⲧ ⲉⲧⲙⲥⲱⲧⲙ ⲛⲥⲁ ⲡⲟⲩⲏⲏⲃ ⲡⲉⲧⲁϩⲉⲣⲁⲧϥ ⲉⲧϣⲙϣⲉ ϩⲙ ⲡⲣⲁⲛ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲏ ⲡⲉⲕⲣⲓⲧⲏⲥ ⲉⲧⲛⲁϣⲱⲡⲉ ⲛⲛⲉϩⲟⲟⲩ ⲉⲧⲙⲙⲁⲩ ⲛϥⲧⲙⲥⲱⲧⲙ ⲛⲥⲱⲟⲩ ⲉϥⲉⲙⲟⲩ ⲛϭⲓ ⲡⲣⲱⲙⲉ ⲉⲧⲙⲙⲁⲩ ⲁⲩⲱ ⲉⲕⲉϥⲓ ⲙⲡⲡⲟⲛⲏⲣⲟⲥ ⲉⲃⲟⲗ ϩⲙ ⲡⲓ︤ⲏ︦ⲗ︥ 13ⲡⲗⲁⲟⲥ ⲇⲉ ⲧⲏⲣϥ ⲉϥϣⲁⲛⲥⲱⲧⲙ ϥⲛⲁⲣϩⲟⲧⲉ ⲛϥⲧⲙⲕⲟⲧϥ ϭⲉ ⲉⲣϣⲁϥⲧⲉ 14ⲉⲕϣⲁⲛⲃⲱⲕ ⲇⲉ ⲉϩⲟⲩⲛ ⲉⲡⲕⲁϩ ⲡⲁⲓ ⲉⲧⲉⲣⲉⲡϫⲟⲉⲓⲥ ⲡⲉⲕⲛⲟⲩⲧⲉ ⲛⲁⲧⲁⲁϥ ⲛⲁⲕ ϩⲛ ⲟⲩⲕⲗⲏⲣⲟⲛⲟⲙⲓⲁ ⲉⲧⲣⲉⲕⲕⲗⲏⲣⲟⲛⲟⲙⲉⲓ ⲙⲙⲟϥ ⲛⲅⲟⲩⲱϩ ϩⲓϫⲱϥ ⲁⲩⲱ ⲛⲅϫⲟⲟⲥ ϫⲉ ϯⲛⲁⲉⲓⲛⲉ ⲉⲃⲟⲗ ϩⲓϫⲱⲉⲓ ⲛⲟⲩⲁⲣⲭⲱⲛ ⲛⲑⲉ ⲛⲛⲕⲉϩⲉⲑⲛⲟⲥ ⲉⲧϩⲛⲡⲁⲕⲱⲧⲉ 15ϩⲛ ⲟⲩⲕⲱ ⲉⲕⲉⲕⲱ ϩⲓϫⲱⲕ ⲛⲟⲩⲁⲣⲭⲱⲛ ⲡⲁⲓ ⲉⲧϥⲛⲁⲥⲟⲧⲡϥ ⲛϭⲓ ⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲕⲉⲕⲁⲑⲓⲥⲧⲁ ⲙⲡⲁⲣⲭⲱⲛ ⲉϩⲣⲁⲓ ⲉϫⲱⲕ ⲉⲃⲟⲗ ϩⲛ ⲛⲉⲕⲥⲛⲏⲩ ⲛⲛⲉⲕⲉϣⲛϭⲉⲣⲱⲙⲉ ⲛϣⲙⲙⲟ ⲉⲃⲟⲗ ⲉϫⲱⲕ ϫⲉ ⲙⲡⲉⲕⲥⲟⲛ ⲁⲛ ⲡⲉ 16ϫⲉ ⲛϥⲛⲁⲧⲁϣⲟ ⲛⲁϥ ⲁⲛ ⲛϩⲉⲛϩⲧⲱⲱⲣ ⲟⲩⲇⲉ ⲛϥⲛⲁⲕⲧⲟ ⲁⲛ ⲙⲡⲗⲁⲟⲥ ⲉϩⲣⲁⲓ ⲉⲕⲏⲙⲉ ϫⲉⲕⲁⲥ ⲉⲛⲛⲉϥⲧⲁϣⲟ ⲛⲁϥ ⲛϩⲉⲛϩⲧⲱⲱⲣ ⲡϫⲟⲉⲓⲥ ⲇⲉ ⲁϥϫⲟⲟⲥ ϫⲉ ⲛⲛⲉⲧⲛⲟⲩⲱϩ ⲉⲧⲉⲧⲏⲟⲩⲧⲛ ⲉⲕⲧⲉⲧⲏⲟⲩⲧⲛ ⲟⲛ ⲉⲡⲁϩⲟⲩ ϩⲓ ⲧⲉⲓϩⲓⲏ 17ⲁⲩⲱ ⲛⲛⲉϥⲧⲁϣⲉⲥϩⲓⲙⲉ ⲛⲁϥ ⲟⲩⲇⲉ ⲛⲛⲉⲡⲉϥϩⲏⲧ ϣⲓⲃⲉ ⲁⲩⲱ ⲟⲩϩⲁⲧ ⲙⲛ ⲟⲩⲛⲟⲩⲃ ⲛⲛⲉϥⲧⲁϣⲟϥ ⲛⲁϥ ⲉⲙⲁⲧⲉ 18ⲁⲩⲱ ⲉϥϣⲁⲛϩⲙⲟⲟⲥ ⲉϫⲛ ⲧⲉϥⲁⲣⲭⲏ ⲉϥⲉⲥϩⲁⲓ ⲛⲁϥ ⲙⲡⲉⲓⲇⲉⲩⲧⲉⲣⲟⲛⲟⲙⲓⲟⲛ ⲉⲩϫⲱⲱⲙⲉ ⲛⲧⲟⲟⲧⲟⲩ ⲛⲛⲟⲩⲏⲏⲃ ⲛⲗⲉⲩⲉⲓⲧⲏⲥ 19ⲛϥϣⲱⲡⲉ ⲛⲙⲙⲁϥ ⲁⲩⲱ ⲛϥⲱϣ ⲛϩⲏⲧϥ ⲛⲛⲉϩⲟⲟⲩ ⲧⲏⲣⲟⲩ ⲙⲡⲉϥⲱⲛϩ ϫⲉ ⲉϥⲉⲥⲃⲟ ⲉⲣϩⲟⲧⲉ ϩⲏⲧϥ ⲙⲡϫⲟⲉⲓⲥ ⲡⲉⲕⲛⲟⲩⲧⲉ ⲉⲧⲣⲉϥϩⲁⲣⲉϩ ⲉⲛⲉⲓⲉⲛⲧⲟⲗⲏ ⲧⲏⲣⲟⲩ ⲙⲛ ⲛⲉⲓⲇⲓⲕⲁⲓⲱⲙⲁ ⲉⲁⲁⲩ 20ϫⲉⲕⲁⲥ ⲉⲛⲛⲉⲡⲉϥϩⲏⲧ ϫⲓⲥⲉ ⲉϫⲛ ⲛⲉϥⲥⲛⲏⲩ ⲁⲩⲱ ϫⲉⲕⲁⲥ ⲉⲛⲛⲉϥⲣⲡⲃⲟⲗ ⲛⲛⲉⲛⲧⲟⲗⲏ ⲉⲟⲩⲛⲁⲙ ⲏ ⲉϩⲃⲟⲩⲣ ϫⲉ ⲉϥⲉⲣⲟⲩⲛⲟϭ ⲛⲟⲩⲟⲉⲓϣ ϩⲛ ⲧⲉϥⲁⲣⲭⲏ ⲛⲧⲟϥ ⲙⲛ ⲛⲉϥϣⲏⲣⲉ ⲛⲙⲙⲁϥ ϩⲛ ⲛϣⲏⲣⲉ ⲙⲡⲓ︤ⲏ︦ⲗ︥
Copyright information for
CopSahBible2